मेडिकव्हर हॉस्पिटलमध्ये 84 वर्षीय रुग्णावर जीवघेण्या महाधमनीच्या विकारावर यशस्वी शस्त्रक्रिया

मेडिकव्हर हॉस्पिटलमध्ये 84 वर्षीय रुग्णावर जीवघेण्या महाधमनीच्या विकारावर यशस्वी शस्त्रक्रिया

पुणे : मेडिकव्हर हॉस्पिटल, भोसरी येथील हृदयविकारतज्ज्ञ आणि कार्डिओव्हॅस्क्युलर अँड थोरॅसिक सर्जरी (CVTS) विभागाने 84 वर्षीय रुग्णावर अत्यंत गुंतागुंतीच्या टाइप-ए एओर्टिक डिसेक्शन या जीवघेण्या आजारावर यशस्वी बेंटॉल (Bentall) शस्त्रक्रिया करून त्याला नवजीवन दिले.

रुग्णाला अशक्तपणा आणि पोटात अस्वस्थता जाणवत असल्याने रुग्णालयात दाखल करण्यात आले. सीटी अँजिओग्राफीसह विविध तपासण्यांमध्ये महाधमनीच्या चढत्या भागापासून (Ascending Aorta) ते मूत्रपिंडाखालील भागापर्यंत (Infrarenal Abdominal Aorta) पसरलेले टाइप-ए एओर्टिक डिसेक्शन असल्याचे निदान झाले. हा आजार कोणत्याही क्षणी महाधमनी फुटण्याचा आणि अचानक मृत्यूचा धोका निर्माण करणारा असल्याने तातडीने शस्त्रक्रियेचा निर्णय घेण्यात आला.

सीव्हीटीएस शल्यचिकित्सकांनी बायोप्रोस्थेटिक एओर्टिक व्हॉल्व्ह आणि व्हॅस्क्युलर कंड्युटचा वापर करून बेंटॉल शस्त्रक्रिया यशस्वीरीत्या पार पाडली. या शस्त्रक्रियेदरम्यान खराब झालेला महाधमनीचा मूळ भाग आणि चढता भाग बदलण्यात आला तसेच हृदयाला रक्तपुरवठा करणाऱ्या कोरोनरी धमन्यांचे पुनर्स्थापन करण्यात आले.

शस्त्रक्रियेनंतर रुग्णाला अतिदक्षता विभागात व्हेंटिलेटर, रक्तदाब नियंत्रित ठेवण्यासाठी आवश्यक औषधे, रक्त व रक्तघटकांचे संक्रमण आणि सतत निरीक्षणाखाली ठेवण्यात आले. उपचारादरम्यान रुग्णाला शस्त्रक्रियेनंतर झटके (फोकल सिझर्स) आणि स्टेटस एपिलेप्टिकस हा न्यूरोलॉजिकल गुंतागुंतीचा त्रास झाला. न्यूरोलॉजी आणि क्रिटिकल केअर विभागाने तातडीने उपचार सुरू करून EEG, MRI, आवश्यक औषधोपचार आणि सतत निरीक्षणाच्या मदतीने ही गुंतागुंत यशस्वीरीत्या नियंत्रित केली. मेंदूच्या तपासणीत कोणतीही गंभीर इजा आढळली नाही.

कार्डिओलॉजी, सीव्हीटीएस सर्जरी, क्रिटिकल केअर, न्यूरोलॉजी, अॅनेस्थेशिया आणि फिजिओथेरपी विभागांच्या समन्वित उपचारांमुळे रुग्णाची प्रकृती हळूहळू सुधारली. त्यांना व्हेंटिलेटरवरून यशस्वीरित्या मुक्त करण्यात आले, फिजिओथेरपीच्या मदतीने चालण्यास सुरुवात झाली आणि अखेर त्यांना स्थिर प्रकृतीत घरी सोडण्यात आले.

याबाबत डॉ. सूरज कुमार पाटील, सल्लागार – इंटरव्हेन्शनल कार्डिओलॉजिस्ट, म्हणाले, “टाइप-ए एओर्टिक डिसेक्शन ही अत्यंत गंभीर शस्त्रक्रिया आणीबाणीची स्थिती आहे. वेळेवर निदान, तातडीची शस्त्रक्रिया आणि विविध तज्ज्ञ विभागांच्या समन्वित उपचारांमुळे एवढ्या उच्च जोखमीच्या वृद्ध रुग्णालाही यशस्वी उपचार देता आले.”

ही यशस्वी शस्त्रक्रिया मेडिकव्हर हॉस्पिटल, भोसरीच्या प्रगत हृदयशस्त्रक्रिया, आधुनिक तंत्रज्ञान आणि बहुविभागीय उपचार पद्धतीतील कौशल्याची साक्ष देणारी असून, जीवघेण्या हृदयविकारांवर वेळेत उपचार केल्यास उत्कृष्ट परिणाम साध्य होऊ शकतात, हे या प्रकरणातून पुन्हा अधोरेखित झाले आहे.