आयजीपीएल नेते, एटीआरआय मुंबई गरुडास आणि द पूना क्लबचा कॅडी कल्याणासाठी पुढाकार

पुणे : आयजीपीएल नेते, एटीआरआय मुंबई गरुडास आणि द पूना क्लबचा कॅडी कल्याणासाठी पुढाकार

येरवडा, २२ ऑगस्ट २०२६ : व्यावसायिक गोल्फ आणि सामाजिक बांधिलकीची सांगड घालत इंडो-गोल्फ प्रीमियर लीगमधील (आयजीपीएल) सध्या अव्वल क्रमांकावर असलेल्या एटीआरआय मुंबई गरुडास जीसीने द पूना क्लब लिमिटेडसोबत भागीदारी केली आहे. कॅडी वेल्फेअर गोल्फ चॅम्पियनशिप २०२६चे आयोजन २२ आणि २३ ऑगस्ट रोजी द पूना क्लब गोल्फ कोर्स येथे करण्यात आले आहे.

दोन दिवसांच्या या उपक्रमात व्यावसायिक गोल्फपटूंकडून प्रशिक्षण, ज्युनिअर प्रशिक्षण क्लिनिक आणि २०० खेळाडूंची प्रो-अॅम चॅरिटी स्पर्धा आयोजित करण्यात आली आहे. मुदिता फाउंडेशनच्या माध्यमातून कॅडींच्या मुलांच्या शिक्षणासाठी दीर्घकालीन मदत उपलब्ध करून देणे हा या उपक्रमाचा मुख्य उद्देश आहे.

२०० खेळाडूंच्या स्पर्धेपूर्वी व्यावसायिक गोल्फपटूंकडून प्रशिक्षण

शनिवारी एटीआरआय मुंबई गरुडास जीसीच्या संपूर्ण व्यावसायिक संघाने ज्युनिअर गोल्फपटू आणि क्लब सदस्यांसाठी विशेष प्रशिक्षण क्लिनिक घेतले. या क्लिनिकमध्ये ऑलिम्पियन गोल्फपटू उदयन माने, दोन वेळा आयजीपीएल लेग विजेता अमन राज, एशियन टूरवरील व्यावसायिक गोल्फपटू आदिल बेदी आणि नवोदित प्रतिभावान तुषार पन्नू यांनी मार्गदर्शन केले.

मुख्य स्पर्धा रविवार, २३ ऑगस्ट रोजी होणार असून त्यात २०० गोल्फपटू टीम स्क्रॅम्बल प्रकारात सहभागी होणार आहेत. प्रत्येक संघात तीन हौशी खेळाडू आणि एक व्यावसायिक खेळाडू असेल. या माध्यमातून स्पर्धेतील प्रत्येक सहभाग कॅडी कल्याणाच्या उपक्रमाला हातभार लावणार आहे.

८० कॅडी कुटुंबांच्या मुलांच्या शिक्षणाला आधार

द पूना क्लब गोल्फ कोर्स येथे झालेल्या संयुक्त पत्रकार परिषदेत आयोजकांनी या उपक्रमामागील उद्देश स्पष्ट केला. सुमारे ८० कॅडींच्या मुलांच्या शिक्षणासाठी दीर्घकालीन आर्थिक मदत उपलब्ध करून देण्याचे उद्दिष्ट ठेवण्यात आले आहे.

एटीआरआय मुंबई गरुडास जीसीचे सीईओ आणि व्यावसायिक गोल्फपटू राजीव दातार म्हणाले, "या स्पर्धेच्या माध्यमातून मुदिता फाउंडेशनच्या सहकार्याने जवळपास ८० कॅडींच्या मुलांच्या शिक्षणाला आम्ही मदत करत आहोत. ही स्पर्धा दरवर्षी अधिक मोठी होत जावी आणि या मुलांना महाविद्यालयीन शिक्षणापर्यंत आम्ही साथ देऊ, अशी अपेक्षा आहे. याच धर्तीवर ६ नोव्हेंबर रोजी चेंबूर गोल्फ क्लबमध्ये मुंबईतही हा उपक्रम राबविण्यात येणार आहे."

द पूना क्लबचे उपाध्यक्ष आणि गोल्फ समन्वयक इंद्रनील मुजगुले म्हणाले, "गोल्फ हा अनेकदा एका विशिष्ट वर्गापुरता मर्यादित खेळ असल्याचे मानले जाते. मात्र, आम्ही आमच्या समुदायातील प्रत्येकासाठी काम करण्याचा सातत्याने प्रयत्न करतो. आमच्या कर्मचारी आणि कॅडींना सुविधा, भोजन, एफआयसीसीआय फ्लोच्या माध्यमातून आर्थिक साक्षरता आणि व्यसनमुक्ती कार्यक्रम उपलब्ध करून देण्यात येतात. मात्र, राजीव दातार आणि एटीआरआय जीसी यांच्या पुढाकाराने सुरू झालेला हा उपक्रम परिवर्तन घडवून आणणारा आहे. कारण यात उच्च शिक्षणावर भर दिला जात आहे—शालेय शिक्षणापासून अभियांत्रिकी आणि वैद्यकीय शिक्षणापर्यंत. पुढील १० ते १५ वर्षांत या कुटुंबांचे जीवनमान उंचावण्यास यामुळे मोठी मदत होईल."

द पूना क्लब लिमिटेडचे अध्यक्ष गौरव गढोके म्हणाले, "गोल्फ हा केवळ स्पर्धेपुरता मर्यादित नसून, एक अधिक सक्षम आणि सर्वसमावेशक समुदाय उभारण्याचे माध्यमही असले पाहिजे, असा द पूना क्लबचा नेहमीच विश्वास राहिला आहे. कॅडी हे या खेळाचा अविभाज्य भाग आहेत. त्यांनी अनेक पिढ्यांपासून गोल्फपटूंना साथ दिली आहे. या स्पर्धेच्या माध्यमातून कॅडींच्या मुलांना त्यांच्या आयुष्याची दिशा बदलू शकतील अशा संधी उपलब्ध करून देण्याचा आमचा प्रयत्न आहे. एटीआरआय मुंबई गरुडास जीसी आणि मुदिता फाउंडेशनसोबतची ही भागीदारी कॅडी कुटुंबांसाठी दीर्घकालीन शैक्षणिक मदत व्यवस्था उभारण्याच्या दिशेने एक महत्त्वपूर्ण पाऊल आहे. हा उपक्रम देशभरातील गोल्फ क्लब्समध्ये दीर्घकालीन चळवळ बनावा, अशी आमची अपेक्षा आहे."

शिक्षणातून गुन्हेगारीपासून दूर ठेवण्याचा प्रयत्न

गोल्फ सब-कमिटी (जीएससी) आणि कॅडी वेल्फेअरचे सल्लागार इक्रम खान यांनी या उपक्रमामागची पार्श्वभूमी सांगितली.

ते म्हणाले, "आमच्या निदर्शनास आले की काही अल्पवयीन मुले शिक्षण सोडून छोटी-मोठी कामे करण्यासाठी बाहेर पडत होती. क्लबमध्ये १८ वर्षांखालील व्यक्तींना काम करण्यास परवानगी नसल्याने काही मुले रिकामी राहत होती आणि त्यातील काही चुकीच्या संगतीत, व्यसनाधीनतेत आणि बालगुन्हेगारीत अडकत होती. काही मुलांनी घरफोड्या केल्यानंतर स्थानिक पोलिसांनी आम्हाला याबाबत माहिती दिली. त्यानंतर आम्ही या समस्येत हस्तक्षेप करण्याचा निर्णय घेतला."

ते पुढे म्हणाले, "तो आमच्यासाठी निर्णायक टप्पा होता. इंद्रनील, राजीव आणि जय शिर्के यांच्यासोबत चर्चा केल्यानंतर गुन्हेगारी रोखण्याचा आणि या कुटुंबांचे भविष्य सुरक्षित करण्याचा कायमस्वरूपी मार्ग म्हणजे शिक्षण असल्याचे आम्हाला जाणवले. मुलांना गोल्फशी जोडून आणि त्यांचे शिक्षण सुरू ठेवून त्यांच्या आयुष्याकडे पाहण्याचा दृष्टिकोन बदलता येतो."

गोल्फ समुदायाला एकत्र आणण्याचा प्रयत्न

एटीआरआय मुंबई गरुडास जीसीचे सहमालक ऋषभ किशोर म्हणाले, "आमचे कॅडी केवळ आमच्या गोल्फ बॅग्ज उचलत नाहीत, तर ते संपूर्ण खेळाचा भार आपल्या खांद्यावर घेतात आणि अनेकदा त्यांना त्याचे श्रेयही मिळत नाही. द पूना क्लबसोबतची भागीदारी म्हणजे या कॅडींसाठी काहीतरी ठोस करण्याच्या आमच्या विश्वासाचे प्रतीक आहे. आमचे चारही खेळाडू या उपक्रमासाठी मैदानावर उपस्थित आहेत. भागीदारांसोबत मिळून हा उपक्रम दरवर्षी राबविला जावा आणि संपूर्ण गोल्फ समुदायाने या खेळासाठी योगदान देणाऱ्यांना परतफेड करण्यासाठी एकत्र यावे, हे आमचे उद्दिष्ट आहे."

एटीआरआय मुंबई गरुडास जीसीच्या सहमालक स्मृती किशोर म्हणाल्या, "आमच्या कुटुंबाचा आणि व्यवसायाचा मंत्रच समाजाला परत देण्याचा आहे. गोल्फचा विस्तार करायचा असेल तर त्याचा पाया मजबूत असणे आवश्यक आहे. कॅडी हे गोल्फच्या संपूर्ण व्यवस्थेतील अविभाज्य घटक आहेत. त्यांच्या मुलांना शिक्षणाच्या माध्यमातून उज्ज्वल भविष्य देणे हाच योग्य मार्ग आहे."

आयजीपीएलचे सीईओ उत्तम सिंह मुंडी म्हणाले, "कॅडी वेल्फेअर गोल्फ चॅम्पियनशिपसारखे उपक्रम आयजीपीएलच्या संपूर्ण व्यवस्थेने कशासाठी काम करावे, याचे उत्तम उदाहरण आहेत. व्यावसायिक गोल्फच्या माध्यमातून संपूर्ण समुदायाला पुढे नेणे हे आमचे उद्दिष्ट आहे. एटीआरआय मुंबई गरुडास जीसीने द पूना क्लबसोबत मिळून या उपक्रमाचे नेतृत्व करणे हे आयजीपीएलच्या मूल्यांचा ठोस संदेश देणारे आहे."

देशभरात वार्षिक उपक्रम उभारण्याचे उद्दिष्ट

द पूना क्लब आणि एटीआरआय मुंबई गरुडास जीसीला कॅडी वेल्फेअर चॅम्पियनशिप हा देशातील विविध गोल्फ सर्किटवर दरवर्षी होणारा उपक्रम बनवायचा आहे. या उपक्रमाची पुढील आवृत्ती नोव्हेंबर २०२६ मध्ये बॉम्बे प्रेसिडेन्सी गोल्फ क्लब, चेंबूर येथे होणार आहे. या स्पर्धेच्या आयोजनासाठी द पूना क्लबचे अध्यक्ष गौरव गढोके आणि गोल्फ कॅप्टन जय शिर्के यांच्या नेतृत्वाचेही यावेळी कौतुक करण्यात आले.