जागतिक बुडणे प्रतिबंध दिनानिमित्त वॉटरवर्ल्ड इंडियाचा पुण्यात तीन दिवसीय जनजागृती उपक्रम*

*जागतिक बुडणे प्रतिबंध दिनानिमित्त वॉटरवर्ल्ड इंडियाचा पुण्यात तीन दिवसीय जनजागृती उपक्रम*

पुणे | जागतिक आरोग्य संघटना (World Health Organization - WHO) यांच्या पुढाकाराने दरवर्षी साजरा करण्यात येणाऱ्या “जागतिक बुडणे प्रतिबंध दिन” (World Drowning Prevention Day) निमित्त वॉटरवर्ल्ड इंडियाच्या वतीने पुण्यात तीन दिवसीय “बुडणे प्रतिबंध जनजागृती अभियान” यशस्वीपणे आयोजित करण्यात आले.

हा उपक्रम वॉटरवर्ल्ड इंडियाच्या वॉटरवर्ल्ड अ‍ॅक्वाटिक क्लब, खराडी, वॉटरवर्ल्ड स्विम स्कूल, वडगाव शेरी आणि वॉटरवर्ल्ड ट्रेनिंग सेंटर, घोरपडी या तीन केंद्रांवर पार पडला. 

या अभियानामध्ये १५० हून अधिक नागरिक, विद्यार्थी, पालक आणि जलतरणप्रेमींनी उत्स्फूर्त सहभाग नोंदविला. या उपक्रमाचा मुख्य उद्देश बुडण्याच्या घटनांविषयी जनजागृती करणे, पाण्याजवळ सुरक्षित वर्तनाची माहिती देणे, पोहण्याचे महत्त्व पटवून देणे तसेच प्रत्येक नागरिकामध्ये जलसुरक्षेबाबत जागरूकता निर्माण करणे हा होता.

यावेळी वॉटरवर्ल्ड इंडियाचे मुख्य कार्यकारी अधिकारी (CEO) विजय कुमार साह यांनी उपस्थितांना मार्गदर्शन करताना सांगितले की, बुडणे ही एक गंभीर परंतु पूर्णपणे टाळता येण्यासारखी दुर्घटना आहे. योग्य वेळी मिळणारे प्रशिक्षण, पोहण्याचे ज्ञान, पाण्यात स्वतःचा बचाव करण्याची कौशल्ये आणि सतर्कता यांच्या माध्यमातून अनेक मौल्यवान जीव वाचविता येऊ शकतात.

ते पुढे म्हणाले, “पाणी हे जीवन आहे, परंतु योग्य ज्ञान आणि सुरक्षिततेची जाणीव नसल्यास ते धोकादायकही ठरू शकते. प्रत्येक बालक, युवक आणि नागरिकाने पोहणे व मूलभूत जलसुरक्षा कौशल्ये आत्मसात करणे ही काळाची गरज आहे. जनजागृती आणि प्रशिक्षणाच्या माध्यमातून आपण बुडण्याच्या घटना मोठ्या प्रमाणात कमी करू शकतो. प्रत्येकाने जलसुरक्षेचा संदेश समाजातील प्रत्येक घरापर्यंत पोहोचविण्यासाठी पुढाकार घ्यावा.”

या तीन दिवसीय अभियानादरम्यान जलसुरक्षा, बुडण्यापासून बचावाचे उपाय, पाण्यातील आपत्कालीन परिस्थितीत योग्य प्रतिसाद, फ्लोटिंग आणि सर्व्हायव्हल तंत्र, तसेच सुरक्षित पोहण्याच्या सवयी यांचे प्रत्यक्ष प्रात्यक्षिकांसह मार्गदर्शन करण्यात आले. उपस्थितांनी या उपक्रमास उत्स्फूर्त प्रतिसाद देत जलसुरक्षेचा संदेश अधिकाधिक लोकांपर्यंत पोहोचविण्याचा संकल्प व्यक्त केला.

वॉटरवर्ल्ड इंडिया ही संस्था पोहणे, जलसुरक्षा, लाइफसेव्हिंग, सीपीआर (CPR), प्रथमोपचार प्रशिक्षण आणि समाजाभिमुख उपक्रमांच्या माध्यमातून सुरक्षित समाज घडविण्यासाठी सातत्याने कार्यरत आहे. जागतिक बुडणे प्रतिबंध दिनानिमित्त आयोजित करण्यात आलेला हा उपक्रम त्याच सामाजिक बांधिलकीचा एक महत्त्वपूर्ण भाग ठरला.