पहिल्या पुणे पिकल बॉल लीग स्पर्धेत टस्कर टायटन्स संघाला विजेतेपद

पुणे, 3 एप्रिल 2025: पिकल हाऊस एक्स एसबीए यांच्या वतीने आयोजित पहिल्या पुणे पिकल बॉल लीग स्पर्धेत अंतिम फेरीत टस्कर टायटन्स संघाने रेजिंग रायनोज संघाचा 3-2 असा पराभव करून विजेतेपद संपादन केले.

कोरेगाव पार्क येथील एनफिल्ड अरेना कोर्टवर सुरू असलेल्या कुमार बिल्डर्स यांचे मुख्य प्रायोजकत्व लाभलेल्या या स्पर्धेत चुरशीच्या अंतिम लढतीत टस्कर टायटन्सच्या हणमंत धोत्रे व निपुण खुराणा यांनी रायनोजच्या कुलदीप रुचंदानी व ईशांत रेगे यांचा 15-08 असा पराभव करून संघाचे खाते उघडले. तर, रायनोजच्या मोक्ष जैन व संकेत राज यांनी टायटन्सच्या सागर

दिवाण व आशना पेडणेकर यांचा 15-06 असा पराभव करून संघाला बरोबरी साधून दिली. टायटन्सच्या सागर दिवाणने ध्रुव दयालच्या साथीत रमा कुलकर्णी व संदेश मनवार यांचा 15-07 असा पराभव करून संघाला 2-1 अशी आघाडी मिळवून दिली. त्यानंतर रायनोजच्या प्रियल चॅटर्जी व संदेश मनवार यांनी हरजस बाजवा व प्रियांका सूर्तानी यांचा 15-12 असा पराभव करून संघाला 2-2 अशी बरोबरी निर्माण करून दिली. त्यामुळे सामना टाय ब्रेकरमध्ये खेळविण्यात आला. टायब्रेकरमध्ये टायटन्सच्या हणमंत धोत्रे व निपुण खुराणा या जोडीने इशांत रेगे व संकेत राज यांचा 15-13 असा पराभव करून संघाला विजय मिळवून दिला.

स्पर्धेतील विजेत्या संघाला करंडक अशी पारितोषिके देण्यात आली. स्पर्धेचे पारितोषिक वितरण स्पर्धा संचालक सुधांशू मेडसीकर, भाव्या मेहता व यश मुंदडा यांच्या हस्ते करण्यात आले.

निकाल: अंतिम फेरी:

टस्कर टायटन्स वि.वि.रेजिंग रायनोज 3-2(हणमंत धोत्रे/निपुण खुराणा वि.वि.कुलदीप रुचंदानी/ईशांत रेगे 15-08; सागर दिवाण/आशना पेडणेकर पराभुत वि.मोक्ष जैन/संकेत राज 06-15; सागर दिवाण /ध्रुव दयाल वि.वि.रमा कुलकर्णी/संदेश मनवार 15-07; हरजस बाजवा/प्रियांका सूर्तानी पराभुत वि.प्रियल चॅटर्जी/संदेश मनवार 12-15; टायब्रेकर: हणमंत धोत्रे/निपुण खुराणा वि.वि.इशांत रेगे/संकेत राज 15-13)