रॅपिडो आणि बेकायदेशीर बाईक टॅक्सींवर कठोर कारवाई करा: डॉ. बाबा कांबळे यांची आक्रमक मागणी!पुण्यात दाखल एफआयआरनुसार कंपनीच्या मूळ मालकांना तात्काळ अटक करा - पुण्यातील सर्व संघटना आक्रमक..
रॅपिडो आणि बेकायदेशीर बाईक टॅक्सींवर कठोर कारवाई करा: डॉ. बाबा कांबळे यांची आक्रमक मागणी!
पुण्यात दाखल एफआयआरनुसार कंपनीच्या मूळ मालकांना तात्काळ अटक करा - पुण्यातील सर्व संघटना आक्रमक..
पुणे, २७ ऑक्टोबर २०२६
महाराष्ट्र रिक्षा पंचायतचे संस्थापक अध्यक्ष, ऑटो टॅक्सी ट्रान्सपोर्ट फेडरेशन ऑफ इंडियाचे नेते तथा गोरगरीब कष्टकऱ्यांचे वाली 'माऊली' डॉ. बाबा कांबळे यांच्या नेतृत्वाखालील विविध रिक्षा संघटनांच्या एका शिष्टमंडळाने आज (२७ ऑक्टोबर २०२६ रोजी) सहपोलीस आयुक्त संजय पाटील यांची प्रत्यक्ष भेट घेऊन सविस्तर चर्चा केली व निवेदन सादर केले.
या भेटीदरम्यान, रॅपिडो कंपनीच्या माध्यमातून केवळ वाहतूक नियमांचे उल्लंघन किंवा करचोरी होत नसून, काही गंभीर गुन्हेगारी कृत्यांमध्ये व देशविघातक कारवायांमध्ये रॅपिडोच्या यंत्रणेचा वापर झाल्याच्या संशयास्पद बाबींवरही चर्चा करण्यात आली. अभिनेता टायगर श्रॉफ याच्यावर झालेल्या गोळीबार प्रकरणात रॅपिडोचा रायडर सापडणे आणि देशाच्या ATS (एटीएस) पथकाने अटक केलेल्या काही व्यक्तींच्या प्रकरणात रॅपिडोच्या सहभागाची किंवा संबंधांची शक्यता नाकारता येत नाही; त्यामुळे या सर्व बाबींची सखोल तपासणी होणे अत्यंत आवश्यक आहे, हा मुद्दा शिष्टमंडळाने गांभीर्याने मांडला. ही केवळ वाहतूक समस्येची नाही तर कायदा-सुव्यवस्थेची गंभीर समस्या असल्याचे स्पष्ट करत, पुणे आरटीओ व विश्रांतवाडी पोलीस स्टेशनमध्ये दाखल झालेल्या एफआयआरनुसार रॅपिडोच्या मूळ मालकांना तात्काळ अटक करण्यात यावी, अशी ठाम व आक्रमक मागणी पुणे पिंपरी चिंचवड शहरातील सर्व ऑटो टॅक्सी व कॅब चालक-मालक यांनी वतीने करण्यात आली आहे .
या संदर्भात तीव्र भूमिका मांडताना ' डॉ. बाबा कांबळे म्हणाले की,
> “पुणे आरटीओच्या वतीने रॅपिडो कंपनीवर अधिकृतपणे एफआयआर (FIR) दाखल करण्यात आला असून, विश्रांतवाडी पोलीस स्टेशनमध्ये रॅपिडोविरुद्ध गंभीर गुन्ह्यांची नोंद करण्यात आली आहे. कंपनीने बेकायदेशीर पद्धतीने विनापरवाना वाहने रस्त्यावर उतरवून शासनाच्या कराची कोट्यवधी रुपयांची चोरी केली आहे. या गंभीर गुन्ह्याखाली पुणे पोलिसांत दाखल झालेल्या एफआयआरनुसार कंपनीच्या मुख्य मालकांना व संचालकांना तात्काळ अटक करण्यात यावी. तसेच, काही गुन्हेगारी प्रकरणांत किंवा संशयित घटनांत रॅपिडोच्या माध्यमातून संबंध असण्याच्या शक्यतेचीही उच्चस्तरीय चौकशी व्हावी.”
>
डॉ. बाबा कांबळे यांच्या प्रमुख मागण्या:
१. मूळ मालकांना तात्काळ अटक करा: विश्रांतवाडी पोलीस स्टेशनमध्ये दाखल झालेल्या एफआयआरनुसार, रॅपिडो कंपनीच्या मुख्य मालकांना व संचालकांना तात्काळ बेड्या ठोकण्यात याव्यात.
२. गुन्हेगारी संदर्भातील सहभागाची तपासणी: अभिनेता टायगर श्रॉफ गोळीबार प्रकरण असो वा एटीएसच्या कारवाईशी संबंधित विषय असो, अशा गंभीर प्रकरणांमध्ये रॅपिडोच्या रायडर किंवा यंत्रणेचा संबंध असण्याच्या शक्यतेची सखोल तपासणी करण्यात यावी.
३. ॲप प्ले स्टोअरवरून हटवा: बेकायदेशीर वाहतुकीला आणि गैरप्रकारांना खतपाणी घालणारे रॅपिडोचे ॲप गुगल प्ले स्टोअर व ॲपल ॲप स्टोअरवरून तात्काळ काढून टाकण्यात यावे.
४. करचोरीची चौकशी व कार्यालये सील: आजवर या कंपनीने शासनाचा किती कर बुडवला आहे, याची सखोल चौकशी करून कंपनीचे सर्व्हर आणि कागदपत्रे जप्त करण्यात यावीत. तसेच पुणे व पिंपरी-चिंचवडमधील कार्यालये सील करावीत.
५. बेकायदेशीर बाईक टॅक्सींवर पूर्ण बंदी: पुणे व पिंपरी-चिंचवड शहरात विनापरवाना धावणाऱ्या ५० हजारांहून अधिक बाईक टॅक्सींवर पूर्ण बंदी घालून लाखो परवानाधारक रिक्षा व टॅक्सी चालकांच्या रोजीरोटीचे रक्षण करावे.
शिष्टमंडळाची उपस्थिती:
या शिष्टमंडळामध्ये राष्ट्रीय अध्यक्ष तथा कष्टकऱ्यांचे नेते '' डॉ. बाबा कांबळे यांच्यासह शिवनेरी रिक्षा संघटना अध्यक्ष अशोक साळेकर, पुणे रिक्षा फेडरेशनचे अध्यक्ष आनंद तांबे, मा साहेब रिक्षा संघटना अध्यक्ष वर्षा शिंदे, येलोपाटी कॅब संघटनेचे अध्यक्ष संतोष शिंदे, आपले वाहतूक संघटना केदार धमाले, शिवनेरी रिक्षा संघटनेचे संस्थापक आबा बाबर, महाराष्ट्र रिक्षा पंचायत पुणे शहर कार्याध्यक्ष विलास केंद्र, तसेच अविनाश वाडेकर, शशिकांत गरड, कार्तिक घारे, अशोक बारवे, विश्वजीत शिंदे आदी मान्यवर व पदाधिकारी मोठ्या संख्येने उपस्थित होते.
लाखों परवानाधारक रिक्षा व टॅक्सी चालकांच्या सुरक्षिततेसाठी आणि शासनाचा महसूल बुडवणाऱ्या अशा कंपन्यांविरोधात लढा अधिक तीव्र केला जाईल, असा इशारा या वेळी 'माऊली' डॉ. बाबा कांबळे यांनी दिला आहे.
Comments
Post a Comment