शिक्षा संस्कृति उत्थान न्यासाची राष्ट्रीय प्रांत संयोजक बैठक संपन्न; “विकसित भारत @2047 साठी शिक्षण” अभियानाला देशव्यापी विस्तार देण्याचा निर्णय• राष्ट्रीय प्रांत संयोजक बैठक संपन्न; ज्ञानसभा आणि आंतरराष्ट्रीय महिला परिषदेची घोषणा• सीबीएसईच्या त्रिभाषा सूत्रावरील प्रस्ताव मंजूर• “विकसित भारत @2047 साठी शिक्षण” अभियानाला राष्ट्रीय स्तरावर विस्तार

शिक्षा संस्कृति उत्थान न्यासाची राष्ट्रीय प्रांत संयोजक बैठक संपन्न; “विकसित भारत @2047 साठी शिक्षण” अभियानाला देशव्यापी विस्तार देण्याचा निर्णय

• राष्ट्रीय प्रांत संयोजक बैठक संपन्न; ज्ञानसभा आणि आंतरराष्ट्रीय महिला परिषदेची घोषणा

• सीबीएसईच्या त्रिभाषा सूत्रावरील प्रस्ताव मंजूर

• “विकसित भारत @2047 साठी शिक्षण” अभियानाला राष्ट्रीय स्तरावर विस्तार

पुणे, 31 मे

शिक्षा संस्कृति उत्थान न्यास, नवी दिल्ली यांची राष्ट्रीय प्रांत संयोजक बैठक श्रीमती नाथीबाई दामोदर ठाकर्सी महिला विद्यापीठ, पुणे येथे यशस्वीरीत्या संपन्न झाली. तीन दिवसीय या बैठकीत देशातील 40 हून अधिक प्रांतांमधील 200 पेक्षा अधिक कार्यकर्ते, शिक्षणतज्ज्ञ आणि पदाधिकारी सहभागी झाले होते. बैठकीत संघटनात्मक विषय, राष्ट्रीय शैक्षणिक धोरण, भारतीय ज्ञानपरंपरा, भारतीय भाषा, वैदिक गणित, संशोधन, शिक्षक शिक्षण, चारित्र्यनिर्माण आणि शिक्षणाच्या विविध आयामांवर व्यापक चर्चा करण्यात आली तसेच आगामी कार्ययोजना निश्चित करण्यात आली.

बैठकीत निर्णय घेण्यात आला की शिक्षा संस्कृति उत्थान न्यास आगामी काळात देशातील 15 हून अधिक प्रांतांमध्ये “ज्ञानसभा” आयोजित करेल. या सभांद्वारे शिक्षण, समाज आणि राष्ट्रनिर्माणाशी संबंधित विषयांवर जनजागृती आणि संवादाला गती दिली जाईल.

तसेच “विकसित भारत @2047 साठी शिक्षण” या विषयावर देशव्यापी अभियान राबविण्याचा निर्णय घेण्यात आला. या अभियानांतर्गत उद्योजक, शिक्षणतज्ज्ञ, प्रशासकीय अधिकारी, लोकप्रतिनिधी, संस्थांचे प्रमुख आणि समाजजीवनातील विविध क्षेत्रांतील प्रतिनिधींना एकत्र आणून प्रत्येक क्षेत्रात समिती स्थापन केली जाईल. ही समिती विकसित भारताच्या निर्मितीत शिक्षणाची भूमिका या विषयावर नियमितपणे कार्य करेल तसेच ठोस कृती आराखडे तयार करून त्यांची अंमलबजावणी करेल.

न्यासाने निर्णय घेतला की येत्या 1 ऑगस्ट रोजी देशातील प्रमुख शिक्षणतज्ज्ञ, धोरणकर्ते आणि विविध क्षेत्रांतील प्रतिनिधी यांच्या सहभागाने तसेच राष्ट्रीय स्वयंसेवक संघाचे सरकार्यवाह मा. दत्तात्रेय होसबळे यांच्या अध्यक्षतेखाली “विकसित भारतासाठी शिक्षण” या विषयावर राष्ट्रीय कार्यक्रम आयोजित करण्यात येईल. या कार्यक्रमाद्वारे या राष्ट्रीय अभियानाला अधिक व्यापक गती दिली जाईल.

बैठकीत हेही निश्चित करण्यात आले की शिक्षा संस्कृति उत्थान न्यास आपल्या स्थापना दिनानिमित्त 2 जुलै रोजी देशातील 100 हून अधिक प्रमुख शहरांमध्ये विविध कार्यक्रम आयोजित करेल. या कार्यक्रमांद्वारे शिक्षणाचा भारतीय दृष्टिकोन, राष्ट्रीय शैक्षणिक धोरण आणि समाजाधारित शिक्षण या विषयांवर व्यापक जनजागृती केली जाईल.

महिला नेतृत्वाचे सक्षमीकरण आणि शिक्षणातील त्यांच्या भूमिकेला केंद्रस्थानी ठेवून येत्या ऑक्टोबर महिन्यात जिम कॉर्बेट येथे आंतरराष्ट्रीय महिला परिषद आयोजित करण्याचा निर्णय घेण्यात आला. या परिषदेसाठी आतापर्यंत 20 हून अधिक देशांतील शिक्षण क्षेत्रातील महिला नेतृत्वाने सहभाग निश्चित केला आहे. शिक्षण क्षेत्रात उल्लेखनीय योगदान देणाऱ्या महिलांची ही एक वैशिष्ट्यपूर्ण आंतरराष्ट्रीय परिषद असेल. या परिषदेत शिक्षण, नेतृत्व, संशोधन आणि सामाजिक परिवर्तन या विषयांवर सखोल विचारमंथन होईल.

बैठकीत आगामी डिसेंबरपर्यंत शिक्षणातून आत्मनिर्भरता, तांत्रिक शिक्षण, वैदिक गणित, प्रचार-प्रसार, चारित्र्यनिर्माण, पर्यावरण संरक्षण आणि शिक्षणाशी संबंधित इतर महत्त्वाच्या विषयांवर राष्ट्रीय स्तरावरील बैठका आणि कार्यशाळा आयोजित करण्याचाही निर्णय घेण्यात आला.

राष्ट्रीय प्रांत संयोजक बैठकीत एक महत्त्वाचा ठराव मंजूर करून केंद्रीय माध्यमिक शिक्षण मंडळ (CBSE) यांनी लागू केलेल्या त्रिभाषा सूत्राच्या प्रभावी अंमलबजावणीच्या निर्णयाचे स्वागत करण्यात आले. ठरावात नमूद करण्यात आले की त्रिभाषा सूत्र हे भारतीय भाषांचे संरक्षण, संवर्धन आणि राष्ट्रीय एकात्मता मजबूत करण्याच्या दिशेने महत्त्वपूर्ण पाऊल आहे. यामुळे विद्यार्थ्यांमध्ये भाषिक कौशल्य, सांस्कृतिक जाण आणि राष्ट्रीय दृष्टी विकसित होण्यास मदत होईल.

या बैठकीत शिक्षा संस्कृति उत्थान न्यासचे राष्ट्रीय सचिव डॉ. अतुल कोठारी, राष्ट्रीय कोषाध्यक्ष श्री सुरेश गुप्ता, राष्ट्रीय संयोजक श्री ए. विनोद, राष्ट्रीय सह-संयोजक श्री संजय स्वामी, श्री ओम शर्मा आणि श्री राजेश्वर पराशर, राष्ट्रीय सहसचिव सौ. सविता सेंगर यांच्यासह देशभरातील पदाधिकारी आणि शिक्षणतज्ज्ञ सहभागी झाले होते.

बैठकीच्या समारोपप्रसंगी वक्त्यांनी सांगितले की विकसित भारताच्या निर्मितीचा पाया शिक्षण आहे. भारतकेंद्री, मूल्याधिष्ठित आणि राष्ट्राभिमुख शिक्षणव्यवस्थेच्या निर्मितीसाठी समाजातील सर्व घटकांना सोबत घेऊन शिक्षा संस्कृति उत्थान न्यास सातत्याने कार्यरत राहील.